عاوزه زوجك يشوفك مميزه ديمًا؟

عاوزه زوجك يشوفك مميزه ديمًا؟

-بلاش لبس الجلاليب فى البيت عمال على بطال…ولا البنطلون تحت الهدوم ولا يجى من برة يلاقيكى رابطة شعرك وضاربة فيه بفتيك مفروم على بيضة نية

-هتمى بالباديكير لرجلك وايدك على فكرة الصوباع الصغنن المدوحس هو واخد باله منه متفتكريش انه متدارى يعنى !?

-بلاش الكحكة بسكر اللى ع طول عملاها فى شعرك فى البيت سيبيى شعرك وحتى لو شعرك بيهيشاعملي دايما في بيتك حمام الزيت للشعر

-دايما ريحتك تبقى حلوة ماتخليهوش يخمن طبخة ايه ع الغدا اول مايقابلك فى وشه من ريحة اللبس وخلى بالك الشعر اكتر حاجة بتمتص ريحة الزيوت والاكل مش بس مجرد تغيير الهدوم…

-إتعودى كل فترة تروحى كوافير لأبسط الحاجات ع الاقل ميبقاش متجوز اخوه جمال فى البيت?..
مش كل اهمال فى نفسنا هنحدفه على جملة الحلاوة حلاوة الروح..لا انتى كمان حلوة الملامح ..?

-اشترى ألوان روج صارخة تحطيها بس فى البيت زى الاحمر او الهافان القريب من الاورانج او اى لون قوى بس يكون بيليق عليكى
مش تحطي رووووج وخلاص بطعم الفراولة لازم تختاري علي حسب شكل شفايفك ولون بشرتك مش عك وخلاص ?
يعنى لازم تبهريه على فترات.?

-مايبقاش لبسك طول اليوم واحد من الصبح لبليل بنفس الجلابية معاكى فى المطبخ معاكى فى شاور العيال معاكى ع الغدا وتغيريها بقى قبل النوم ..ايوة هنجدد اهو ياسلام ..نلاقى نفس سحنتها بس لون بصلى اصل البصلى اشيك بليل ! ؟?

-متناميش وشعرك مربوط بمنديل اجدادنا كل مايتقلب يعينى يلاقى عم عبده بتاع البيبس نايم جنبه? …ابقى لفيه لما يروح الشغل…

-جربى تلبسى فستاين قصيرة زى بتاعة الاجانب سواء بتاعة النهار او سهرة وجربى لبس الكعب ?بس بعد ماالولاد تنام عشان متحدفيهوش بفردة فى عينه ولا تخلعيهم وتمسكيهم ماسكة بطيخة الموظف المطحون لو ميدو الصغير طلع يجرى على فيشة الكهربا…?

-لما تصحى الصبح اعملى اسنانك و خدى نعناع عشان متبوظيش اى لحظة رومانسية كانت بتشاور عقلها تحصل..واهريه هو كمان نعناع والعيال نعناع وجارتك نعناع انعشى المواطنين ماهى زاطت بقى ?

-ماحبكتش التنضيف وهو فى البيت وخيالك انه هيرفع رجله ويهزر معاكى زى اغنية اليسا اجمل احساس فى الكون…لأن الواقع هتغنى ياشبشب الهنا اشمعنا بس انا…??

-بلاش قمصان النوم اللى بريش لا بتعرفى تعلقيها ولا بتطبق ولا بتعرفى تمشى بيها اصلا. ده اما تلاقى الريش قلب بيتك عشة فراخ?

-محبكتش ماسك الزبادى بالتوم على وشك وهو قاعد ويسلام بقى مع زعيقك للولاد بنفس تكنيك لا تسألنى من انا…ماهو مش زبادى الصبح وريش بليل كتييير كده كتيير يا فوزيه ??

خليكى دايما واثقة انك جميلة..انثى..مميزة وقادرة تبقى احلى واحدة ..وجسمك وهيئتك ليكى انتى قبل اى حد تانى ..

سلوى

28 سنة

guest
2 تعليقات
الأكثر تصويتاً
الأحدث الأقدم
Inline Feedbacks
View all comments
ام احمد
ام احمد

تسلمي ع النصايح الجميله الي كنا مبنعملهاش فعلا

منار
منار

ههههههههههههه ضحكتيني جدا

أضيفي مناقشة جديدة

    2
    0
    شاركي بتعليق جديد على هذه المناقشةx
    ()
    x