نصائح لتسهیل الطبخ

? خلي عندك في الفريزر كيلو لحمة عصاج (لحمة مفرومة مستويه) هيساعدك في اي زنقة عزومة او طبخه سريعه.. حطي كبشه منها على حلة بسلة، حله كوسة، حلة فاصوليا.. ممكن تبقى وجبه لوحدها مع حلة رز وسلاطة وشوربه وبطاطس محمره.. وبتبقى موفرة جداً..

? تسبيكة المحشي .. هاتي 3كيلو طماطم مع كيلو بصل واضربيهم في الخلاط.. وحطيهم على النار يتصلصوا.. واول ما يتصلصوا انزلي عليهم ببرطمان صلصه.. حطي بهاراتك وملحك وفلفل وسمنك وزيتك بكمية تكفي حجم الطماطم.. وسيبيها تبرد.. قطعي عليها الخضرة زي ما تحبي.. مع الزعتر والنعناع .. وشيلها في اكياس في الفريزر..
حمري بصلاية في شوية زيت مع توماية وتطلعي الكيس من دول على شووية رز مغسول .. بقى عندك خلطة محشي والبصل هيخليها فريش..

?.. تبقي غلطانة قوي لو بتجيبي البقسماط_ناعم من بره.. ده بقايا الافران.. هاتي بـ2جنيه عيش فينو ، قطعيهم بالطول وحمصيهم في الفرن 5 ق وبعدين سيبيهم ينشفوا بره يوم (او حطيهم في الميكروويف 5 ق) واطحنيهم وحطي نصهم دقيق.. واقولك سر تتبيله ولا فيجيتار: حطي زعتر ، توم ناشف، بصل ناشف، كسسبرة، ملح وفلفل ، جنزبيل بودرة حسب مزاجك.. وبقى عندك احسن بقسماط في مصر..

? هاتيليك كيلو_بانيه أو اكتر.. وتبيله بشوية خل وبهارات وملح وفلفل ساعتين، وبعدين حطيه في البقسماط بتاعك واضربي عليه بايدك ورصيه في طبق بلاستيك او صينية، وبين الطبقات حطي كيس نايلون ، وشيليه في الفريزر.. يطلع من الفرزير على التحمير علطول، لا هيوقع بقسماط ولا هيتعبك.. وبلاش بيض وبلاش بصل..

? اعملي صينيتين_جلاش وقطعيهم وشيلي على عددكم في اكياس بحيث تعملي لكل واحد 2-3 قطع حسب حجم الخارطه، اول ما تعمليه شيليه عشان يبقى فريش.. وطلعيه في الايام اللي حاسه فيها ان سفرتك ناقصها حاجه، تسخنيه في الميكرويف..او في طاسه تيفال على نار هاديه.. او تولعي فرن بوتجازك واول ما يسخن قوي حطي الجلاش فيه واقفلي النار واقفلي الفرن عليه..

.?. اعملي صلصة_جاهزة .. هاتي الطماطم واضربيها في الخلاط وحطيها على النار مع شوية زيت وبهارتك لحد ما تصلص.. وممكن تحطي عليها برطمان صلصه.. اول ما تصلص .. سيبها لما تهدا وشيليها في اكياس تلاجها املي نص الكيس وبططيه وشيليها في الفريرز بحيث تكون عامله زي الملوخيه المجمده ، بتبقى سهله في كسرها وتحطي على الاكل على قد ما تحتاجي..

.?. اعملي دريسنج_السلاطة .. هاتي ازازة بيبسي بلاستيك صغيره..حطي فيها معلقة ملح ومعلقة كمون وربع فلفل اسود ونص معلقة زعتر ونص كسبره وامليها تلات اربعها خل والباقي زيت وشيليها في التلاجه.. وكل ما تعملي سلاطه ولا تقطعي طماطمايه رجي الازازه دي ورشي منها رشه على السلاطة.. يا سلام لو زيت زيتون.. ويا سلام لو تحطي فص توم مفدوغ..

..? شيلي فراخك_متبلة .. اول ما تجيبي فراخك وتنضفيها.. تبليها ببهاراتك وشويه خل وشيليها متبله في الفريزر.. كل كيس فيه عدد القطع بتاعةاليوم.. هتسهل عليكي كتير.. لو هتشويها اول ما تطلعيها رشي عليها ليمون واضربي بصلايه مع طماطمايه وحطيها في صينية بسبوسه او صينيه ملهاش حافه ودخليها الفرن من غير مايه.. ساعه واحدده .. لو هتسلقيها طلعيها في ماي مغليه على النار مع فصين حبهان وبصلايه.. الفراخ المتبله طعمها مختلف فعلا..

?.. طاسه_تيفال سليمه ممكن تحل محل الميكرويف في التسخين.. حطي اكلك فيها وعلى نار هاديه وغطيها 5-8 ق هيكون الاكل سخن وكون الطاسه تيفال هتخلي الاكل ميلزقش وبنفس رصته في الطاسه ينزل في الطبق.. وخليها طاسه مش حله عشان تعرفي تزحلقي منها الاكل..

?..لما تجيبي كيلو_اللحمة اسلقيه كله، واول ما يستوي شويه.. شيلي اللحمه من الشوربه وسيبي الشوربه على النار لحد ما تنقص وتبقى مركزه اطفي عليها وسيبيها تبرد.. قسمي اللحمه على عدد الطبخات ومعاها كوبايتين من الشوربه المركز وشيليها في علبه او في كيس في الفريزر، لما تحبي تطبخيها مع_خضار .. تطلعيها مع كوبايتين مايه وبعد ما تغلي غلوتين نزلى عليها الخضار بتاعك والصلصه .. مش هتاخد منك على النار اكتر من وقت تسوية الرز.. خلال نص ساعة هتكون جاهزه مع الخضار.. ولو عايزاها #كباب_حله هتحطيها بشوربتها على النار لحد ما تستوي وتعمل صصوص الكباب حله..

..? لو بتعرفي تعملي ممبار .. احشيه واسلقيه وشيليه مسلوق في الفريزر ..ويوم ما تحبي تستخدميه سيبيه يفك واغلي مايه فيها معلقة صلصه وشويه ملح وفلفل ونزلية فيها دقيقه وطلعيه حمريه.. هيكون زي الفريش..

..? شيلي خضارك متنضف ومتقطع على الطبخ، وشيلي خضار سلاطتك متنضف..شيلي السلق بتاعك متحمر ومضروب في الخلاط في اكياس..

?كفتة_الرز تحمريها وتتقسم في اكياس على قد الاكل وتشليها في الفريزر وتطلع على الصلصه على طول ..

..? وكفتة_اللحمة حطي عليها توابلها مع البصل واعمليها صوابع وشيلها في اطباق فويل فالفريزر وطلعيها تفك نص ساعه.. وحطيها بطبقها في الفرن .. او ممكن تكوريها وتحطيها في الفريزر،ولما تطلعيها سويها في صلصة وتبقى داود_باشا ..

.? كل ده هيساعدك لو عزومة فجأة او لما النور يقطع في اوقات حرجه.. متضيعيش وقتك في المطبخ.. وفري وقتك لحاجات تانيه أهم….

جهاد

guest
1 تعليق
الأكثر تصويتاً
الأحدث الأقدم
Inline Feedbacks
View all comments
فطووم
فطووم

كلام جميل تسلمي

أضيفي مناقشة جديدة

    1
    0
    شاركي بتعليق جديد على هذه المناقشةx
    ()
    x